Jyrlaımyn zamanymdy jańa týǵan,

Azattyq kindiginen jaratylǵan!

Elbasy baǵdarymdy aıqyndady,

Tórt bólip tún uıqysyn tań atyrǵan.

Shattyǵym nurǵa bólep shańyraqty,

Kóńildiń kók aspanyn jadyratty.

Asqaqtap Báıteregim odan saıyn,

Jaıqalyp japyraǵyn jamyratty!

Júrektiń mazdap úmit tórindegi,

Tabyldy eń keregim ómirdegi.

Asqar taý, baıtaq dala tebirenip,

Tirildi kepken tamyr shólimdegi.

Jarqyrap jaınamaımyz jańarmasaq,

Eskini eregesken tabanǵa sap.

Kóldeneń jurt kúlmeı me júrer joldy,

Adasyp ashyq kúnde taba almasaq.

Jas urpaq, túptegi asyl zatyńdy izde,

Jalǵasqan babalardan hatyńdy úzbe!

Jahandyq uly kóshke ilese bil,

Jat emes keshe kórgen «latyn» bizge.

Babalar búgingi urpaq umytpasqa,

Taǵdyryn jazyp ketken tilip tasqa.

Túskende ult múddesi tarazyǵa,

О́zara ókpe-nazdy syryp tasta!

Qaıtemiz maqtan etip jer ólshemin,

Kıeli ár súıemi keń ólkeniń.

Bolǵany jurtyń azat azdyq eter,

Bolmasa rýhyń azat eger seniń.

Jaılaǵan erkin qonyp, erkin kóship,

Atajurt – kúmis qundaq, altyn besik.

Qusadan jarylady naǵyz qazaq,

Turmasa dala terbep, taý tildesip.

Halqynyń qasıetin tanyta alǵan,

Qazaqtyń bári kókjal, bári tarlan.

Topyraq olar úshin qudiretti,

Bir tamshy kindiginiń qany tamǵan.

Balańnyń týǵan jerge kózin úıret,

Atadan qalǵan asyl sózin úıret!

Men kepil, top jarmasa, báıge almasa,

Bozókpe bolmasa eger ózi kúırek.

Qamshylap súıreseń de neshe jerden,

Shyǵa almas tulpar shyqqan esek órden.

Nar uldar áke kórgen oq jonady,

Arýlar ton pishedi sheshe kórgen.

Súımeıdi sergek halyq jalǵandyqty,

Tektiniń tuqymynda talǵam myqty.

Alyp shyq asqar taýdyń jotasyna,

Otanyń ıyǵyńa salǵan júkti!

Tógilip zerdesinen altyn bulaq,

Qazaqqa kúlli dúnıe salsyn qulaq.

Júrseń de qaı qıyrda, qaı túkpirde,

Týǵan el júregińde bolsyn biraq!

Jaınasyn jetkinshektiń bári túlep,

Qudaıdan jalynamyn sony tilep.

Tursa eken keýde kerip, asqaq qarap,

Myna taý, myna dala meniki dep!..

О́z ulyń bastap otyr jarqyn jolǵa,

Túpki oıyn túsine bil, halqym, qolda!

Zerdesi zeńgir kókteı tunyq elge,

Bereri táńiriniń taýsylǵan ba?!

Bıiktep usham deseń alǵa sirá,

Qam jasa qanatyńnyń talmasyna.

Qyrandaı dúr silkinip qaıta túlep,

Serik bol samǵaǵanda Elbasyǵa!..