- Jaqynda Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń Astanadaǵy gastroldik sapary aıasynda latyn álipbıi jaıly «Áripter álemine saıahat» atty tanymdyq ertegi sahnalanǵan bolatyn. Balalarǵa arnalǵan qoıylym degenmen, taqyryby aýqymdy, ıdeıasy da eleń etkizerlikteı erekshe eken...

- Onyńyz ras, ıdeıasy ótimdi, búgingi kúnniń mańyzdy taqyryby ǵoı. Desek te, taqyryp qanshalyqty aýqymdy bolǵanmen, balanyń sanasyna salmaq salmaıtyndaı jeńil, túsinikti ári jalyqtyrmaıtyndaı qyzyqty bolǵany shart. Balalarǵa arnalǵan dramatýrgııanyń ereksheligi sol, onda astarly sóz, fılosofııalyq oılardan góri negizinen is-áreketke basymdyq berilýi tıis. Balabaqshaǵa baratyn, bastaýysh synypta oqıtyn bala latynnyń, kırıll qarpiniń ne ekenin túsine bermeıdi ǵoı. Bul jerde aıtyp túsindirgennen góri, kórsetip túsindirgen anaǵurlym áserli shyǵatyny anyq. Sondyqtan latyn alfavıtindegi áripter, onyń mán-mańyzy jaıly habar berip, túsinik qalyptastyrý maqsatynda «Áripter álemine saıahat» atty tanymdyq ertegini sahnaladyq. Qazir Elbasynyń tapsyrmasyna sáıkes, elimizde jańa álipbıge kóshýge ázirlik jumystary qyzý júrip jatqany málim. Osynaý uly dúbirge bizdiń de qosar úlesimiz bolsyn dep balalarǵa arnap jańa qoıylymdy sahnaǵa shyǵardyq. Oqıǵa jelisine qysqasha toqtala ketsek, ár erteginiń jaǵymdy jáne jaǵymsyz keıipkeri bolady. Munda Jaqsybek pen Buzyqbek bar. Jańa Latyn álipbıi patshalyǵynyń kósemi retinde Abyzdy da qostyq. Abyzdy Qydyr ata men Aıaz atadan ereksheleý úshin tyń, kórkem beıne oılap taptyq. Al rólderdegi kırıll men latyn áripteri – jansyz beıne. Olar sóılegende ǵana qozǵalady, qalǵan ýaqytta tapjylmaıdy, biraq bárin túsinedi. Osylaısha, balalarǵa la¬tyn álipbıiniń qoǵamdaǵy rólin shynaıy jetkizýge tyrystyq.

- Siz buǵan deıin de balalarǵa arnalǵan «Bremen mýzykanttary», «Batyl kójekter» syndy qoıylymdardyń rejısseri bolǵanyńyzdy bilemiz. «Balalar dramatýrgııasynyń jóni bólek» dep aıttyńyz jańa, myna taqyrypty da ózińiz attaı qalap aldyńyz ba? Bul ertegini kim jazdy, jalpy? Sahnalyq nusqasy qalaı jasaldy?

- Bul shyǵarma teatrdyń tapsyrysymen arnaıy jazyldy. Aldymen birneshe dramatýrgjazýshyǵa pesa jazý týraly usynys jasalyp, nátıjesinde, Álibek Baıbol esimdi jas dramatýrgtyń jumysy qabyldandy. Al ol ertegini sahnalaý maǵan tapsyryldy. Bir aıdaı ýaqytta elep-ekshep, ıleýin qandyryp baryp sahnaladyq. Osylaısha Músirepov teatry alǵash latyn álipbıin sahnaǵa alyp shyqty.

- «Áripter álemine saıahatty» kishkentaı kórermender qalaı qabyldap jatyr? Bul qoıylymdy elimizdiń ózge óńirlerinde de kórsetý josparda bar ma?

- Iá, búginde, Qazaqstan Respýblıkasy Mádenıet jáne sport mınıstrliginiń qoldaýymen ertegimiz qazan aıynyń 1, 2, 3 kúnderi Astana qalasynyń jas kórermenderine usynylyp, úlken qoshemetke ıe bolyp, ata-analar, mektep basshylary atynan alǵysqa bólenip keldi. Ózge óńirlerden de qyzyǵýshylyq tanytyp jatqandar barshylyq. Taqyryptyń mańyzdylyǵyn eskere otyryp, aldaǵy ýaqytta «Áripter álemine saıahat» tanymdyq ertegisin respýblıkamyzdyń barlyq aımaqtaryndaǵy balalar tamashalasa degen oıymyz, usynysymyz da joq emes, árıne.

- Áńgimeńizge rahmet!