– Ádisteme basqarmasy oqý-ádistemelik, ǵylymı-ádistemelik, uıymdastyrý jáne nasıhattaý baǵyttaryna sáıkes jumystardy úılestirip, júzege asyrady.

2019 jyly elimizdiń túrli óńirlerinde 12 saǵattyq «Jańa emle: qurylymy men mazmuny» dáris-semınary ótti. 2040 maman jańa emleniń jańalyqtary boıynsha dáris-semınarǵa qatysyp, anyqtama aldy. Aǵymdaǵy jyldyń 26 naýryzynan bastap 72 saǵattyq «Jańa emleni oqytý ádistemesi» respýblıkalyq oqytý kýrsy Nur-Sultan qalasynda jalǵasyp jatyr. Bul kýrstardy elimizdiń 17 oblys ortalyǵynyń oqytýshylary, ulttyq kompanıalardyń qazaq tili mamandary, aýdarmashylary támamdady. Osy ýaqytqa deıin jalpy 380 qazaq tili mamany men aýdarmashy kýrstan ótti.

Osy jyly jańa álipbı men emleni oqytýǵa arnalǵan «Jańa emle» oqý-ádistemelik quraly, respýblıkalyq deńgeıdegi «Jańa jazý» oqý quraly, «Jańa emle: qurylymy men mazmuny» ádistemelik quraly jaryqqa shyqty. Bular – jańa qazaq jazýymen jazylǵan tuńǵysh eńbekter.

Qazaqstandaǵy etnostarǵa arnalǵan «Ana tili» mátinder jınaǵy da daıyndaldy.

– 12 saǵattyq dáris-semınar jáne 72 saǵattyq oqytý kýrsynyń ádisteme tásilderi qandaı?

– Atalǵan kýrstar boıynsha dáris-semınardy tájirıbeli, bilikti ǵalymdar men oqytýshy-ádiskerler júrgizedi. Oqý materıaldaryn aýdıtorıaǵa usynýda dástúrli ádistermen qatar B.S.Blým taksonomıasy, «aqparatpen tanysý, reprodýksıa jáne prodýksıa» úshtaǵany, poster, klaster, djıgso ádisteri, mı shabýyly, kýbızm jáne taǵy basqa dástúrli emes ádister qoldanylady. Sondaı-aq A.G.Rıvınniń oqytý ádisterin (toptyq, ujymdyq jumys) basshylyqqa alyp oqytady.

Trenerler úshin «Jazý psıhologıasy» taqyrybyna semınar-trenıńter ótedi. Sabaq barysynda oqytýshy «Сase-study», róldik jáne iskerlik oıyndar, «soft skills» (jumsaq daǵdylar) ádisterin paıdalanady.Jańa álipbı men jańa emleni oqytýda trenerlerge IT tehnologıalar arqyly sabaq berýdiń joldary túsindiriledi. Ortalyqtaǵy «Qazlatyn.kz» ulttyq portalynda usynylǵan «Tilmedia», «Emle», «Qujat.kz», «Atau.kz» túrli veb-servıster, mobıldi qosymshalar kómegimen jańa emleni úıretedi..

– Jańa emleni meńgertýdegi izdenisterińiz?

– Jańa emleni meńgertýde ózge ult ókilderine arnalǵan oqýlyqtar men oqý quraldaryn, ádistemelik termınder sózdigin jazýdy, sondaı-aq emle erejeni qashyqtyqtan oqytýdy uıymdastyrý jumystaryn oılastyryp jatyrmyz. Aqparattyq tehnologıalardyń qarqyndy damyǵan kezinde beınedárister, onlaın sabaqtar, mobıldi qosymshalar arqyly oqytý josparlanyp otyr.